जयपूर : राजस्थानमध्ये पंचायत राज निवडणुकीच्या पहिल्या टप्प्याचे मतदान गुरुवारी सकाळी 7 वाजता सुरू झाले. या टप्प्यात 16 जिल्हा परिषदांच्या 293 वार्डांसाठी आणि 104 पंचायत समित्यांच्या 1,788 वार्डांसाठी मतदान होत आहे. राज्य निवडणूक आयोगाच्या माहितीनुसार, 85,07,304 मतदार 6,926 उमेदवारांचे भवितव्य ठरवतील.
जिल्हा परिषद आणि पंचायत समिती अशा दोन पदांसाठी प्रत्येक मतदार दोन वेळा मतदान करेल. त्यामुळे प्रत्येक केंद्रावर दोन ईव्हीएम ठेवण्यात आल्या आहेत. पहिल्या टप्प्यासाठी एकूण 9,886 मतदान केंद्रे उभारली असून मतदान संध्याकाळी 6 वाजेपर्यंत चालेल.
पहिल्या टप्प्यात अजमेर, अलवर, बाडमेर, भीलवाडा, बिकानेर, डुंगरपूर, जयपूर, झालावाड, जोधपूर, कोटा, नागौर, पाली, फलोदी, राजसमंद, सिरोही आणि उदयपूर जिल्ह्यांत मतदान होत आहे. जिल्हा परिषद सदस्य पदासाठी 1,693 तर पंचायत समिती सदस्य पदासाठी 5,233 उमेदवार रिंगणात आहेत.
निवडणूक आयोगाने मतदान केंद्रांवर मतदारांसाठी पाणी, सावली आणि बसण्याची व्यवस्था करण्याचे निर्देश दिले आहेत. काही ठिकाणी कंट्रोल युनिट बिघडल्याने मतदान उशिरा सुरू झाल्याचेही समोर आले. भीलवाडा जिल्ह्यातील लसाडिया ग्रामपंचायतीच्या बूथ क्रमांक 91 वर मशीन बदलल्यानंतर मतदान सुरू झाले.
भाजप आणि काँग्रेस दोन्ही पक्षांसाठी ग्रामीण भागातील आपला जनाधार सिद्ध करण्याचे आव्हान आहे. जिल्हा परिषद व पंचायत समिती निवडणुकीचे संपूर्ण निकाल 20 नोव्हेंबरला जाहीर होतील. त्यापूर्वी 24 ऑक्टोबरला सरपंच व वॉर्ड पंच तर 25 ऑक्टोबरला उपसरपंच पदासाठी निवड होणार आहे.