नवी दिल्ली : भाजपने मंगळवारी आपल्या युवा मोर्चाचे राष्ट्रीय पदाधिकारी जाहीर केले. युवा मोर्चाचे अध्यक्ष व वडोदराचे खासदार हेमांग जोशी यांनी नव्या पदाधिकाऱ्यांची नावे जाहीर केली. या नेमणुका तत्काळ लागू होतील, असे त्यांनी सांगितले.
'भाजप राष्ट्रीय अध्यक्ष नितीन नबीन यांच्या निर्देशानुसार या सदस्यांची युवा मोर्चाचे राष्ट्रीय पदाधिकारी म्हणून नेमणूक केली जात आहे,' असे जोशी यांनी निवेदनात म्हटले.
सात जणांची राष्ट्रीय उपाध्यक्षपदी नेमणूक झाली. जम्मू-काश्मीरचे आमदार शगुन परिहार व पश्चिम बंगालचे आमदार सौमेन कार्फा यांच्यासह उत्तर प्रदेशचे निखिल मणी तिवारी, नागालँडचे अरविंद दमानी, तेलंगणाचे मलोथ कोमली नाईक, बिहारचे राजेंद्र सिंह व छत्तीसगडचे भूपेंद्र नाग यांचा समावेश आहे.
बिहारच्या आमदार व लोकप्रिय लोकगायिका मैथिली ठाकूर यांची राष्ट्रीय कार्यकारिणी सदस्य म्हणून नेमणूक झाली. त्यांच्यासह विविध राज्यांतील 33 जण कार्यकारिणीत आहेत.
राष्ट्रीय महासचिव म्हणून ओडिशाच्या अर्पिता अपराजिता बडजेना, उत्तर प्रदेशचे हर्षवर्धन सिंह व आंध्र प्रदेशचे मित्ता वंशी कृष्णा यांची नेमणूक झाली. आसामचे बिस्वजित खौंड, मध्य प्रदेशचे आशिष झाला, महाराष्ट्राच्या सायली रघुनाथ कुलकर्णी, राजस्थानचे हिमांशू शर्मा, पंजाबचे सरदार अर्जनजोत ब्रार, झारखंडचे अमन यादव व बिहारचे राहुल झा हे राष्ट्रीय सचिव म्हणून काम पाहतील.
उत्तर प्रदेशचे विनीत वत्स त्यागी यांची राष्ट्रीय कोषाध्यक्षपदी, तर राजस्थानचे देवव्रत सिंह राजावत यांची सहकोषाध्यक्षपदी नेमणूक झाली.
युवा मोर्चाच्या नव्या राष्ट्रीय कार्यकारिणीतील 34 सदस्यांपैकी पाच उत्तर प्रदेशचे, तर बिहार, गुजरात, केरळ, मध्य प्रदेश, महाराष्ट्र व राजस्थानचे प्रत्येकी दोन सदस्य आहेत. उर्वरित सदस्यांमध्ये अंदमान-निकोबार, अरुणाचल प्रदेश, छत्तीसगड, दिल्ली, दादरा-नगर हवेली व दमण-दीव, हरियाणा, हिमाचल प्रदेश, जम्मू-काश्मीर, कर्नाटक, लडाख, मणिपूर, मेघालय, पुदुचेरी, पंजाब, तेलंगणा, त्रिपुरा व पश्चिम बंगाल येथून प्रत्येकी एक सदस्य आहे.
या नेमणुकांमागे आगामी निवडणुकांच्या पार्श्वभूमीवर संघटनात्मक फळी बळकट करण्याचा भाजपचा प्रयत्न मानला जात आहे. नव्या कार्यकारिणीत देशभरातील जवळपास प्रत्येक राज्य व केंद्रशासित प्रदेशाचे प्रतिनिधित्व असल्याचे विश्लेषक सांगतात.