पायांत पडलेले फोड विसरून टाळ-मृदंगाच्या तालावर तल्लीन होणारी लाखो पावले, ‘ज्ञानोबा-तुकाराम’च्या नामघोषाने दुमदुमणाऱ्या वाटा आणि जात-पात-धर्माच्या पलीकडे जाऊन केवळ प्रेमाचे अधिष्ठान जपणारा वारकरी संप्रदाय... महाराष्ट्राचा हा शतकानुशतके वाहणारा भक्तीचा अलौकिक प्रवाह आता थेट जगाच्या नकाशावर मानाने झळकला आहे. मुख्यमंत्री देवेंद्र फडणवीस यांच्या अत्यंत संवेदनशील, दूरदर्शी आणि आग्रही पुढाकारातून साकारलेल्या ‘पंढरपूर वारी – इन द फूटस्टेप्स ऑफ द सेंट्स’ (Pandharpur Wari – In the Footsteps of the Saints) या इंग्रजी माहितीपटाने प्रतिष्ठेच्या ‘एशियन अकॅडमी क्रिएटिव्ह अवॉर्ड्स २०२६’ (Asian Academy Creative Awards 2026) मध्ये भारताचा ‘सर्वोत्कृष्ट ब्रँडेड कार्यक्रम’ (National Winner) म्हणून ऐतिहासिक बहुमान पटकावला आहे.
वारकरी परंपरेचे पावित्र्य आणि महाराष्ट्राची महान संतसंस्कृती जागतिक पातळीवर पोहोचवण्यासाठी मुख्यमंत्री फडणवीस यांनी स्वतः घेतलेली वैयक्तिक काळजी आणि दिलेली दिशा यामुळेच हा जागतिक गौरव शक्य झाल्याची भावना व्यक्त होत आहे.
भक्ती आणि समतेचा संदेश सातासमुद्रापार; २२ मिनिटांत अवतरली आषाढी वारी
महाराष्ट्राच्या माहिती व जनसंपर्क महासंचालनालयाने आंतरराष्ट्रीय ख्यातीच्या ‘वॉर्नर ब्रदर्स डिस्कव्हरी’च्या (Warner Bros. Discovery) सहकार्याने या २२ मिनिटांच्या अप्रतिम माहितीपटाची निर्मिती केली आहे. डिस्कव्हरीच्या जगभरातील नामांकित वाहिन्यांवरून हा माहितीपट कोट्यवधी आंतरराष्ट्रीय प्रेक्षकांपर्यंत पोहोचवला गेला. संत ज्ञानेश्वर महाराज आणि जगद्गुरू संत तुकाराम महाराज यांनी जगाला दिलेली बंधुभाव, सामाजिक समता, मानवता आणि समर्पणाची शिकवण कोणत्याही भाषेच्या मर्यादा ओलांडून थेट परदेशी अभ्यासक आणि प्रेक्षकांच्या काळजाला भिडली आहे.
केवळ एक सोहळा म्हणून नव्हे, तर जगातील सर्वात शिस्तबद्ध, शाश्वत आणि पर्यावरणपूरक जनसंस्कृती म्हणून पंढरपूर वारीचे दर्शन या माहितीपटाच्या माध्यमातून घडवण्यात आले आहे.
“वारी हा केवळ सोहळा नाही, तर भेदाभेद संपवणारी विश्वाची माऊली आहे!” – मुख्यमंत्री देवेंद्र फडणवीस
या जागतिक सन्मानाबद्दल भावूक पण तितक्याच अभिमानास्पद शब्दांत भावना व्यक्त करताना मुख्यमंत्री देवेंद्र फडणवीस म्हणाले,
“पंढरपूरची वारी ही केवळ एका प्रांताची वा धर्माची यात्रा नाही; तर ती जात, पात, धर्म, श्रीमंत-गरीब हा कोणताही भेद न करता प्रत्येकाला विठूरायाच्या एकाच रंगात रंगवणारी विश्वाची साद आहे. संतांनी या मातीला दिलेला हा समतेचा विचार सातासमुद्रापार पोहोचावा, हीच माझी प्रामाणिक तळमळ होती. माहिती व जनसंपर्क विभागाने अत्यंत श्रद्धेने आणि कल्पकतेने तयार केलेल्या या माहितीपटाला भारताचा राष्ट्रीय पुरस्कार मिळणे, हा महाराष्ट्रातील प्रत्येक वारकऱ्याचा आणि संतांच्या चरणांचा गौरव आहे.”
या अद्वितीय यशाबद्दल मुख्यमंत्र्यांनी माहिती व जनसंपर्क विभाग आणि वॉर्नर ब्रदर्स डिस्कव्हरीचे विशेष कौतुक केले असून, महाराष्ट्राच्या समृद्ध परंपरेचा हा जागतिक दस्तावेज प्रत्येक नागरिकाने पाहावा, असे आवाहनही त्यांनी केले.
आंतरराष्ट्रीय स्तरावर वारकरी संस्कृतीची मोहोर – ब्रिजेश सिंह
माहिती व जनसंपर्क विभागाचे प्रधान सचिव तथा महासंचालक ब्रिजेश सिंह यांनी या यशाची पार्श्वभूमी मांडताना सांगितले की, “आशिया-पॅसिफिक भागातील अनेक नामांकित आणि दर्जेदार निर्मितींमधून या माहितीपटाची भारताचा राष्ट्रीय विजेता म्हणून निवड झाली आहे. मुख्यमंत्र्यांच्या मार्गदर्शनामुळे महाराष्ट्राचे संतसाहित्य, भक्तीपरंपरा आणि वारीची अद्वितीय सांस्कृतिक ताकद जागतिक व्यासपीठावर एका नव्या उंचीवर प्रस्थापित झाली आहे.”
माऊलींच्या पादुकांवर माथा टेकवणाऱ्या सामान्य वारकऱ्यापासून ते जगातील विचारवंतांपर्यंत सर्वांनाच एकत्र आणणारा हा वारीचा चित्रपट आता जगभरात भारताची सांस्कृतिक ओळख बनून दिमाखात फडकत आहे.