भाजपचे लोकप्रतिनिधी थेट मैदानात; मदतीचा ओघ सुरू
पावसाअभावी खरीप पिकांचे प्रचंड नुकसान झाले असून शेतकरी आर्थिक अडचणीत सापडला आहे. या गंभीर परिस्थितीत केवळ घोषणा न करता भाजपचे लोकप्रतिनिधी थेट मदतीसाठी पुढे सरसावले आहेत. आमदार जितेश अंतापूरकर यांनी जाहीर केलेला एका महिन्याचा पगार दुष्काळग्रस्त कुटुंबांच्या तात्काळ मदतीसाठी आणि मदतकार्यासाठी वापरण्यात येणार आहे.
यापूर्वी लोहा-कंधारचे ज्येष्ठ नेते आणि आमदार प्रतापराव पाटील चिखलीकर यांनीही शेतकऱ्यांप्रती बांधिलकी जपत आपले एका महिन्याचे मानधन दुष्काळ निवारणासाठी देण्याचा निर्णय घेतला होता. भाजपच्या दोन्ही आमदारांनी दाखवलेली ही संवेदनशीलता शेतकरी वर्गात दिलासा देणारी ठरत आहे.
मुख्यमंत्री देवेंद्र फडणवीस यांचा तातडीचा दिलासा; आमदार निधीतून २५ लाखांची तरतूद
दुष्काळाच्या या आव्हानाला सामोरे जाण्यासाठी राज्य सरकारचे नेतृत्व करत असलेले मुख्यमंत्री देवेंद्र फडणवीस यांनी प्रशासनाला युद्धपातळीवर कामाला लावले आहे. नांदेड जिल्ह्यातील १६ पैकी तब्बल १४ तालुक्यांचा समावेश दुष्काळग्रस्त यादीत करण्यात आला असून, शेतकऱ्यांपर्यंत सर्व शासकीय सवलती तत्परतेने पोहोचवण्यासाठी शासन कटिबद्ध आहे.
विशेष म्हणजे, मुख्यमंत्री देवेंद्र फडणवीस यांच्या नेतृत्वाखालील सरकारने दुष्काळग्रस्त तालुक्यांमध्ये पाणी आणि चाऱ्याचा प्रश्न तातडीने मार्गी लावण्यासाठी आमदारांना त्यांच्या स्थानिक विकास निधीतून (MLA Fund) २५ लाख रुपयांपर्यंतचा निधी थेट खर्च करण्याची विशेष परवानगी दिली आहे. या गतिमान निर्णयामुळे स्थानिक पातळीवर पाणीपुरवठा आणि जनावरांच्या चाऱ्याची सोय करणे अत्यंत सुलभ झाले आहे.
अचूक पंचनामे आणि तातडीच्या मदतीसाठी भाजपचा पाठपुरावा
आपल्या मतदारसंघातील शेतकऱ्यांच्या पाठीशी ठामपणे उभे राहताना आमदार जितेश अंतपूरकर म्हणाले, "भाजप आणि मुख्यमंत्री देवेंद्र फडणवीस यांचे सरकार सदैव बळीराजाच्या पाठीशी उभे राहिले आहे. नुकसान झालेल्या प्रत्येक शेताचे अचूक पंचनामे, त्वरित भरपाई आणि दुष्काळ सवलती वेळेत शेतकऱ्यांपर्यंत पोहोचवण्यासाठी आम्ही स्वतः प्रशासकीय पातळीवर थेट पाठपुरावा करत आहोत. या संकटातून शेतकऱ्याला बाहेर काढल्याशिवाय आम्ही स्वस्थ बसणार नाही."