दुशान्बे : दहशतवादाचा सामना करताना कोणतेही दुटप्पी धोरण चालणार नाही, अशा शब्दांत संरक्षणमंत्री राजनाथ सिंह यांनी मंगळवारी पाकिस्तानला लक्ष्य केले आणि 'दहशतवादाची परिसंस्था' उखडून टाकण्यासाठी संघटित प्रयत्नांचे आवाहन केले. ताजिकिस्तानची राजधानी दुशान्बे येथे शांघाय सहकार्य संघटनेच्या (एससीओ) सदस्य देशांच्या शासनप्रमुखांच्या २५व्या परिषदेत ते बोलत होते.
या परिषदेत पाकिस्तानचे उपपंतप्रधान व परराष्ट्र मंत्री मोहम्मद इशाक दार उपस्थित होते. 'दहशतवादामुळे समाज कट्टर होतो आणि तरुणाईला मिळायला हव्या असलेल्या संधी हिरावल्या जातात. दहशतवादाला कोणतेही समर्थन नाही, त्याचा सामना करताना दुटप्पीपणा नाही आणि दहशतवाद्यांना अर्थसाह्य, पाठिंबा वा आश्रय देणाऱ्यांना कुठेही स्थान नाही,' असे सिंह म्हणाले.
दहशतवादामुळे निरपराधांचे प्राण जातात आणि गुंतवणूक व व्यापारालाही फटका बसतो, याकडे त्यांनी लक्ष वेधले. भू-राजकीय तणाव, व्यापार व पुरवठा साखळीतील अडथळे, ऊर्जा व अन्नसुरक्षेची चिंता आणि जागतिक अर्थव्यवस्थेतील अनिश्चितता यांना तोंड देण्यासाठी सदस्य देशांनी एकमताने पावले उचलावी, असे ते म्हणाले.
पंतप्रधान नरेंद्र मोदी यांच्या वतीने भारताचे प्रतिनिधित्व करणाऱ्या सिंह यांनी पश्चिम आशियातील संघर्षामुळे पुरवठा साखळ्यांवर पडलेल्या ताणाकडेही अप्रत्यक्षपणे निर्देश केला. 'बदलत्या जागतिक आर्थिक वातावरणात एससीओ देशांना मजबूत पुरवठा साखळ्या, अधिक व्यापार-गुंतवणूक आणि तंत्रज्ञानाधारित विकास यावर एकत्र काम करावे लागेल,' असे ते म्हणाले.
भारताची भूमिका स्पष्ट असल्याचे सांगत त्यांनी आंतरराष्ट्रीय उत्तर-दक्षिण वाहतूक कॉरिडॉर आणि चाबहार बंदर यांसारख्या उपक्रमांचा उल्लेख केला. या उपक्रमांमुळे मध्य आशियाला मोठ्या बाजारपेठांशी जोडता येईल, असे ते म्हणाले.
सिंह यांनी २०२६ ते २०३० कालावधीतील बहुपक्षीय व्यापार व आर्थिक सहकार्य कृती आराखड्याला भारताचा पाठिंबा असल्याचे पुन्हा स्पष्ट केले. ताश्कंद येथे युनिव्हर्सल सेंटर आणि दुशान्बे येथे अमली पदार्थविरोधी केंद्र उभारण्याच्या निर्णयांचे स्वागत करत त्यांनी या वर्षाच्या अखेरीस भारतात होणाऱ्या पहिल्या 'एससीओ सभ्यता संवादा'साठी सदस्य देशांना निमंत्रण दिले. ऑगस्ट-सप्टेंबर २०२६मध्ये बिश्केक येथे झालेल्या शिखर परिषदेतील चर्चेचीही त्यांनी आठवण करून दिली.