पुणे : जिल्हा परिषदेच्या आवारात सोमवारी राजकीय वलय असलेला कार्यक्रम भरला आहे. यशवंतराव चव्हाण भवनात दिवंगत उपमुख्यमंत्री अजित पवार यांच्या अर्धाकृती पुतळ्याचे अनावरण केंद्रीय गृह व सहकारमंत्री अमित शाह यांच्या हस्ते होत आहे. उपमुख्यमंत्री सुनेत्रा अजित पवार यांच्या विनंतीवरून हा कार्यक्रम आयोजित करण्यात आल्याचे सांगण्यात येते.
मुख्यमंत्री देवेंद्र फडणवीस, उपमुख्यमंत्री सुनेत्रा पवार आणि एकनाथ शिंदे, केंद्रीय राज्यमंत्री मुरलीधर मोहोळ आणि राज्यसभा खासदार शरद पवार यांच्या उपस्थितीत हा कार्यक्रम होणार असल्याचे निमंत्रणपत्रात नमूद केले आहे. जिल्हा परिषद अध्यक्ष वीरधवल जगदाळे यांनी ही माहिती दिली.
सकाळी १० वाजता जिल्हा परिषदेच्या प्रवेशद्वाराच्या कमानीचे उद्घाटन होणार आहे. त्यानंतर छत्रपती शिवाजी महाराज आणि यशवंतराव चव्हाण यांच्या पुतळ्यांना पुष्पांजली अर्पण केली जाईल. अजित पवार यांच्या कार्याची आठवण करून देणारे विशेष छायाचित्र दालनही उघडले जाणार आहे. त्यांच्या जीवनावरील कॉफी टेबल बुक आणि लघुपटही प्रदर्शित केले जाणार आहेत.
जिल्हा परिषदेचे मुख्य कार्यकारी अधिकारी गजानन पाटील यांच्या म्हणण्यानुसार, हे स्मारक प्रशासकीय शिस्त आणि लोकसेवेची प्रेरणा देत राहील. अजित पवार यांनी प्रशासन जनतेकडे वळवण्यावर भर दिला होता, असेही ते म्हणाले.
कार्यक्रमापूर्वीच वादही उभा राहिला आहे. रिंगरोडला अजित पवार यांचे नाव द्यावे, अन्यथा आंदोलन करू, असे आवाहन रोहित पवार यांनी समाजमाध्यमांवर केले आहे. अजित पवार यांच्या पाठिंब्यावर मंत्रिपद भूषवणाऱ्यांनी ही मागणी का पुढे नेली नाही, असाही सवाल त्यांनी केला आहे.
जिल्हा परिषद परिसरात फ्लेक्सबाजीही जोरात आहे. शिवसेनेच्या फ्लेक्सवर भाजपचे राष्ट्रीय अध्यक्ष नितीन नबीन यांचा फोटो झळकल्याने चर्चा रंगली आहे. दुपारी १२ वाजता शाह भारत इतिहास संशोधक मंडळात मराठा इतिहास डिजिटायझेशन प्रकल्पाचे लोकार्पण करणार आहेत.
कार्यक्रमाला खासदार सुप्रिया सुळे यांच्याही उपस्थितीची शक्यता आहे. जिल्हा परिषदेचे सभापती अमोल नलावडे आणि दीपाली हुल्लावळे तसेच अतिरिक्त मुख्य कार्यकारी अधिकारी चंद्रकांत वाघमारे हेदेखील कार्यक्रमात उपस्थित राहणार आहेत.