मुख्य मजकुराकडे जा
मुख्यमंत्रीमुख्यमंत्री
मनोरंजनमहाराष्ट्र

वरळीतील नेहरू सेंटरमध्ये दर रविवारी मराठी नाटक; 22 नोव्हेंबरपासून सुरुवात, नाट्यगृह सवलतीच्या दरात

वरळी येथील नेहरू सेंटरमध्ये 22 नोव्हेंबरपासून दर रविवारी दुपारी 3.30 वाजता मराठी नाटकांचे प्रयोग होणार आहेत. अखिल भारतीय मराठी नाट्य परिषदेच्या पुढाकाराने हा उपक्रम; निर्मात्यांना नाट्यगृह सवलतीच्या दरात मिळणार.

· · १ मिनिटाचे वाचन

मुंबई : वरळी येथील नेहरू सेंटरमध्ये आता दर रविवारी मराठी नाटकांचे प्रयोग होणार आहेत. अखिल भारतीय मराठी नाट्य परिषदेच्या पुढाकाराने हा उपक्रम 22 नोव्हेंबरपासून सुरू होणार असून सुरुवातीला प्रयोग दुपारी 3.30 वाजता होतील.

नेहरू सेंटरचे मुख्य कार्यकारी अधिकारी नितीन करीर यांनी पत्रकार परिषदेत ही माहिती दिली. व्यावसायिक आणि प्रायोगिक अशा दोन्ही प्रकारच्या नाटकांना या उपक्रमात स्थान असेल. रविवारच्या प्रयोगांसाठी मराठी नाट्यनिर्मात्यांना नेहरू सेंटरचं नाट्यगृह सवलतीच्या दरात मिळणार आहे.

रविवार हा व्यावसायिक नाट्यप्रयोगांसाठी महत्त्वाचा दिवस असतो, पण या दिवशी चांगलं नाट्यगृह मिळणं निर्मात्यांसाठी अनेकदा कठीण ठरतं. ही अडचण लक्षात घेऊन हा निर्णय घेतल्याचं करीर यांनी सांगितलं.

"नेहरू सेंटर केवळ नाट्यगृह उपलब्ध करून देणारं ठिकाण न राहता महत्त्वाचं सांस्कृतिक केंद्र म्हणून विकसित व्हावं, असा प्रयत्न आहे. देशभरातील उत्तम नाट्यसंस्था, कलाकार आणि निर्मात्यांना प्रोत्साहन देण्याची भूमिका आम्ही घेत आहोत," असं ते म्हणाले.

नेहरू सेंटरमध्ये यापूर्वी मराठी, हिंदी आणि इंग्रजीसह विविध भाषांतील सांस्कृतिक कार्यक्रम आणि नाट्यप्रयोग सादर झाले आहेत. हिंदी आणि गुजराती नाटकांचे प्रयोगही येथे नियमित होतात. मराठी नाटकांनाही या व्यासपीठावर अधिक संधी मिळावी, अशी व्यवस्थापनाची इच्छा होती.

या उपक्रमांतर्गत 'ही दोस्ती तुटायची नाही' या नाटकाचा प्रयोग सादर झाला आहे. पुढील प्रयोगांचं नियोजनही झालं असून त्यात 'पुढच्या शुक्रवारी सात वाजता', 'भूमिका', 'जर तरची गोष्ट', 'काटकोन त्रिकोण', 'आमने सामने' आणि 'मराठी बाणा' या नाटकांचा समावेश आहे.

वेळापत्रक असं — 22 नोव्हेंबर रोजी 'पुढच्या शुक्रवारी सात वाजता' दुपारी 3.30 वाजता, 29 नोव्हेंबर रोजी 'भूमिका' दुपारी 3.30 वाजता आणि 6 डिसेंबर रोजी 'जर तरची गोष्ट' दुपारी 4 वाजता.

प्रयोगांना मिळणाऱ्या प्रतिसादानुसार भविष्यात आठवड्यातील इतर दिवशीही मराठी नाटकं सादर करण्याचा विचार असल्याचं व्यवस्थापनानं सांगितलं.