अमरावती : रामपुरी कॅम्पच्या मुख्य रस्त्यावर साई सचूराम दरबारच्या मार्गावर उभारण्यात येत असलेल्या प्रवेशद्वाराचा बीम मंगळवारी सायंकाळी सेंट्रिंगसह कोसळला. मलब्याखाली दबून चार मजूर जखमी झाले. सर्वांना अग्निशमन दल आणि स्थानिकांच्या मदतीने बाहेर काढून जिल्हा सामान्य रुग्णालयात दाखल करण्यात आले.
जखमींमध्ये मो. ऐफाज (२६), जमीर खान समशेर खान (३५), शेख मुजफ्फर शेख बब्बू (२४) आणि शेख जमीर यांचा समावेश आहे. हे सर्व मजूर नागपुरी गेट पोलीस ठाण्याच्या हद्दीतील रहिवासी असल्याचे पोलिसांनी सांगितले. एका मजुराच्या पायाला तर दुसऱ्याच्या डोक्याला गंभीर दुखापत झाल्याचे वैद्यकीय सूत्रांनी सांगितले. सध्या चौघांचीही प्रकृती स्थिर असून उपचार सुरू आहेत.
महापालिकेच्या प्रभाग क्रमांक सातमधील कृष्णानगर-रामपुरी कॅम्प येथे गेल्या तीन महिन्यांपासून सुमारे २२ फूट उंच आणि २० फूट रुंदीच्या प्रवेशद्वाराचे बांधकाम सुरू होते. दोन्ही बाजूंचे काँक्रीट पिलर उभे राहिले होते. मंगळवारी पिलरना वरच्या बाजूने जोडण्यासाठी बीम टाकण्याचे काम हाती घेण्यात आले होते.
सकाळपासून १२ ते १५ मजूर बीममध्ये काँक्रीट भरण्याचे काम करत होते. २२ फूट उंचीवर काम सुरू असल्याने मजुरांना उभे राहण्यासाठी तात्पुरती चैली उभारण्यात आली होती आणि बीमला सेंट्रिंग लावले होते. अवघे पाच ते सहा घमेले काँक्रीट भरणे बाकी असताना संपूर्ण बीम खाली कोसळल्याचे प्रत्यक्षदर्शी कामगारांनी सांगितले.
घटनेची माहिती मिळताच परिसरातील नागरिकांनी धाव घेतली. बाबा कॉर्नर ते रामपुरी कॅम्पमार्गे विलासनगरला जोडणारा हा मुख्य रस्ता असल्याने वाहतूक काही काळ बंद ठेवण्यात आली.
गाडगे नगर पोलीस ठाण्यात नगरसेवक मनीष चेतन बजाज यांनी दिलेल्या तक्रारीवरून कंत्राटदार पंकज शर्मा (रायली प्लॉट) आणि आदित्य गुप्ता (साईनगर) यांच्याविरुद्ध हलगर्जीपणाचा गुन्हा दाखल झाला आहे. भारतीय न्याय संहितेच्या कलम १२५ (अ) आणि २९० अन्वये गुन्हा नोंदवण्यात आल्याचे पोलिसांनी सांगितले.
'बीमचा मलबा ओला होता आणि रस्त्यावर पसरला होता. त्यामुळे वाहतूक ठप्प होऊ शकली असती, म्हणून जेसीबी आणून मलबा हटवला,' असे बजाज यांनी पोलिसांना सांगितल्याचे तक्रारीत नमूद आहे. ठाणेदार गोरखनाथ जाधव यांच्या मार्गदर्शनाखाली पुढील तपास सुरू आहे.
प्रवेशद्वाराचे काम गुरुनानक जयंतीपूर्वी (२४ नोव्हेंबर) पूर्ण करण्याचे लक्ष्य होते, असे स्थानिक पातळीवर सांगण्यात आले. बीम कोसळण्यामागे सेंट्रिंगची आधारव्यवस्था किंवा बांधकामातील त्रुटी कारणीभूत ठरल्या का, याची सखोल चौकशी करण्याची मागणी परिसरातील नागरिकांनी केली आहे.
या घटनेत कोणतीही जीवितहानी झाली नाही.